Четири милиони евра ќе бидат вложени во обнова на патните правци Бошков Мост-Дебар и Мелнички МостЦентар Жупа, која треба да заврши за една година. Патниот правец Мелнички Мост е во должина од осум километри и инвестиција од 1,2 милиони евра, додека за делницата од Бошков Мост-Дебар која исто така е во должина од осум километри ќе бидат инвестирани 2,57 милиони евра.
-Рехабилитацијата почна пред неколку дена, а двата правца треба да бидат завршени во рок од една година- изјави денеска министерот за транспорт и врски Владо Мисајловски.
Со градоначалниците на општините Дебар, Ружди Љата, на Центар Жупа, Ариан Ибраин и Маврово Ростуше, Мукрем Мехмеди се запознаа со текот на градежните активности. Мисајловски истакна дека инфраструктурните проекти што се реализираат во Дебарско произлегле од барањата на жителите од овој регион на средбите со премиерот Никола Груевски при неговата посета на овој крај. При крај е и рехабилитацијата на регионалниот пат Ново Село до Маврово, кој всушност претставува поврзување со овие два регионални патни правци. Исто така на патниот правец Дебар Струга се постави нова сообраќајна сигнализација и опрема во должина од 51 километар.
-Пред почеток на реализација се и други проекти- рече Мисајловски.
Министерот за транспорт и врски информира дека е потпишан договор за санација на три свлечилишта на регионалниот пат Маврово Дебар кои се очекува да бидат завршени 2016/2017 година. Во делот на регионалните патишта, рече Мисајловски, во тек на изградба или реконсрукција се 13 патишта со вкупно 167, 5 километри или инвестиција од 48,9 милиони евра.
-За следната година планираме изградба и реконструкција на уште 13 регионални правци со вкупна должина од 259 километри или инвестиција од 386 милиони евра. Од нив пет се нови ескпресни патишта- додаде Мисајловски.
Заедничка оценка на тројцата градоначалници е дека ова е историски ден зашто на рехабилитацијата се чекало со децении. Подобрувањето на патната инфраструктура, истакаа, за жителите од мавровскореканскиот, дебарскиот регион и Жупа значи и надеж за забрзан економски развој.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
