Кампања на УНИЦЕФ за децата со попреченост

Кампања за поттикнување акција преку која ќе се смени начинот на кој општеството гледа на децата со попреченост и начинот на кој се однесува кон нив започна Фондот за деца при Обединетите нации (УНИЦЕФ) заедно со група активисти.

Како што се наведува во соопштението на УНИЦЕФ Македонија, стигматизацијата, ставовите и недостигот на свесност придонесуваат кон дискриминацијата и отфрленоста со кои се соочуваат децата со попреченост.

Претставникот на УНИЦЕФ Бертран Демулен нагласува дека децата со попреченост се среќаваат со различни бариери за нивна инклузија, така што ставовите во општеството често претставуваат поголема попреченост отколку состојбата на детето или попреченоста што ја има.

Кампањата #ЗаПравиченСвет има за цел да вклучи активисти кои ќе проговорат гласно за нефер состојбата на децата со попреченост. Преку социјалните медиуми, активистите ги повикуваат сите да дадат заложба дека ќе почнат да го менуваат начинот на кој гледаат на децата со попреченост.

Наодите од анкетата за знаењата, ставовите и практиките во однос на вклучувањето на децата со попреченост, спроведена на 1.000 испитаници во период од 29 септември до 20 октомври 2014 година покажуваат дека само 36 проценти од широката јавност слушнале за Конвенцијата на ОН за правата на лицата со попреченост, додека повеќе од третина, односно 37 проценти од широката јавност не прифаќаат дете со аутизам или 36 отсто дете со Даунов синдром да живее во исто соседство со нив.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.