Собранието на Република Македонија во рамките на 73. седница денеска треба да донесе одлука за распишување оглас за нови членови на Државната изборна комисија.
Измените на Изборниот законик што беa донесени како резултат на разговорите во рамки на договорот од 2 јуни/15 јули предвидуваат зголемување на бројот на членовите на ДИК. Така сега ДИК ќе биде составена од девет членови односно претседател и потпретседател и седум членови. Тие оваа функција ќе ја вршат професионално со право на повторен избор, а Собранието ќе избира нов состав за време од пет години најдоцна 30 дена пред истекот на мандатот на постојниот состав.
По завршувањето на огласот за членови на ДИК кој трае осум дена, собраниската Комисија за прашања на изборите и именувањата подготвува предлог-листа од пријавените кандидати и ја доставува до Собранието.
Политичките партии од власта и од опозиција предлагаат по тројца членови, а останатите тројца се бираат од редот на пријавените.
Политичката партија во опозиција со најголем број пратеници во Собранието предлага двајца членови, а политичката партија во опозиција со втор најголем број на пратеници предлага еден член на ДИК. Партиите на власт предлагаат тројца членови и тоа политичката партија на власт со најголем број пратеници во Собранието предлага двајца членови, а политичката партија на власт со втор најголем број пратеници предлага еден член на ДИК. Тројца членови на комисијата се избираат на заеднички предлог на партиите од власта и опозицијата од редот на пријавените кандидати.
Членовите на ДИК ги избира Собранието со двотретинско мнозинство гласови од вкупниот број пратеници. Собранието ги избира и претседателот и потпретседателот на ДИК од редот на членовите. Претседателот или потпретседателот на ДИК, според новите измени на Изборниот законик, треба да е од редот на припадниците на најголемата немнозинска заедница.
Претседателот на Собранието ги известува политичките партии на власти во опозиција во рок од три дена од денот на приемот на известувањето за завршување на огласот да му достават предлог за членови на ДИК. Ако политичките партии не ги утврдат и не ги достават имињата на кандидатите во определениот рок, членовите на ДИК ги предлага Комисијата за прашања на изборите и именувањата на Собранието.
Членови на ДИК предложен од страна на политичка партија може да биде избрано лице државјанин на Република Македонија со постојано место на живеење во Република Македонија, да е дипломиран правник со најмалку пет години работно искуство и да не е член на орган на политичка партија.
Оние членови на ДИК кои не се избираат на предлог на политичките партии треба да се државјани на Република Македонија и постојано место на живеење да им биде тука, да имаат завршено високо образование и најмалку пет години работно искуство, да не е член на орган на политика партија во последните две години, да не бил и да не е носител или кандидат за носител на јавна функција во државната и локалната власт, да не е јавен поддржувач на политиките на власта или опозицијата и да има стручни познавања и искуства во областа на изборите и изборните процеси.
Во рамките на 73. седница на Собранието на дневен ред е и дополнетиот Предлог на Буџетот на РМ за 2016 година.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
