Шулц: Ситуацијата со мигрантите во Грција е драматична

Претседателот на Европскиот Парламент, Мартин Шулц, состојбата со мигрантите во Грција ја оцени за драматична.Оваа оценка Шулц ја даде откако ги посети Атина и островот Лезбос. Според него, неопходно да се направи многу повеќе за ситуацијата да може да се стави под контрола. Шулц забележа дека на островот ја посетил првата „жешка точка“ во Грција, каде дневно се обработуваат по 2.500 лица.

Првостепена задача за грчката Влада, смета Шулц, е да оспособи пет вакви „жешки точки“, за кои има дадено ветување. На второ место тој го стави исполнувањето на задолжителните квоти за раселување на мигрантите, а на трето порешителното протерување на мигрантите, кои не одговараат на барањата за стекување статус азилант. Како четврта задача претседателот на ЕП го посочи „отворениот разговор“ со Турција за прашањето на миграцијата.

– Циниците сакаат да се фокусираат врз малиот број досега раселени мигранти во Грција, изјави Шулц по повод вчерашниот прв лет со Сиријци и Ирачани од Атина за Луксембург.

„Во следните денови сакам да видам десетици такви летови кон сите држави од ЕУ. Тоа на шверцерите ќе им ја испрати пораката дека можеме да ги отстраниме од патот на мигрантите, а на мигрантите дека постојат безбедни патишта“, додаде првиот човек на ЕП.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.