Тринаесет мигранти загинаа во Егејското Море

Најмалку 13 мигранти, меѓу кои шест деца се удавија денеска во Егејското Море, покрај грчкиот брег, кога се превртеа два мали брода, кои отпловиле од турскиот брег кон Грција, соопшти грчката крајбрежна стража.

Едната трагедија се случила покрај островот Самос, кога се превртел брод на само 20 метри од брегот.

Пронајдени се десет тела, во кабината на бродот, меѓу кои на шест деца, вклучувајќи четири бебиња, додека телото на последната жртва, млада девојка, испливало на островот, каде десетици бегалци деновиве ги загубија животите обидувајќи се да стигнат до Европа.

Двајца други мигранти се водат како исчезнати, а крајбрежната стража наведува дека 15 лица извадила од водата.

Брод на Фронтекс исто така пронашол две тела во близина на островот Фармакониси, во близина на Самос. Фронтекс спасил тројца мигранти, кои изјавиле дека чамецот во кој биле превезувал 15 лица, кога потонал во турските води.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.