МВР со соопштение за насилството во Струга

Група од повеќе жители на струшкото село Враништа синоќа го блокираа регионалниот пат Струга-Дебар. Настанот се случи во 23 часот и 30 минути во близина на крстосницата за селото Ложани, со што се предизвика привремен застој во сообраќајот, се вели во соопштението на МВР.

По кратко време, на околу 50-тина метри од крстосницата се собрала друга група жители на селата Велешта, Октиси и Лабуништа, при што настанале вербални дофрлања и навреди. Со навремена интервенција на полициски службеници, спречена е можноста од поголемо нарушување на јавниот ред и мир.

На овој настан синоќа, му претходело нарушување на јавниот ред и мир во кое лицата А.Н. (44) од Враништа и Б.Ш. (46) од Лабуништа се полесно повредени од здобиени удари со железни предмети. Овој настан се случил во 23 часот во близина на спортскиот полигон кај Враништа кога на регионалниот пат биле застанати четири лица со нивните патнички  моторни возила. Притоа, настанала вербална расправија и физичка пресметка.

Полициската станица од Струга презема интензивни мерки за идентификација на учесниците во нарушувањето по што ќе поднесе кривична пријава.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.