Фондот за развој на Абу Даби ќе разгледува проекти за соработка со Македонија

Република Македонија и Обединетите Арапски Емирати паралелено со политичките односи треба да работат на засилување на економските односи. И двете страни се посветени на градење дијалог помеѓу двете земји кој ќе води кон унапредување на заемните односи.

Ова, како што соопштува владината прес-служба, е истакнато на средбата на премиерот Никола Груевски со министерот за меѓународна соработка и развој на ОАЕ, шеикот Лубна Бинт Калид Ал Касими, која се одржа во Емиратот Абу Даби, а во рамки на посетата на Обединетите Арапски Емирати.

На средбата стана збор за опциите за соработка на конкретни инфраструктурни проекти, во делот на можностите за заедничка соработка во изградба на комунална и образовна инфраструктура, како и можностите за соработка во областа на туризмот и земјоделството. За оваа цел договорено е нашите институции да преземат чекори за воспоставување комуникација и односи со Фондот за развој на Емиратот Абу Даби, со кој субјект би се разгледувале проекти од наведените области и би се детализирале можностите за соработка.

Соговорниците разговараа за предизвиците произлезени од бегалската криза и за можностите за нивно менаџирање и надминување, при што беше истакнат заедничкиот став дека најдобар начин за надминување на тие предизвици е координирано и заедничко дејствување на меѓународната заедница.

Двете страни разговараа и за други теми од билатерален и од мултилатерален карактер.

Министерството за меѓународна соработка и развој на ОАЕ е координатор на развојните проекти кои се поддржуваат со финансиските средства од страна на ОАЕ, во вредност од повеќе милијарди американски долари на годишно ниво.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.