САД очекуваат работните групи да продолжат со нивната работа во однос на спроведување на обврските од договорот од Пржино, а политичките партии да ги ставаат интересите на државата на прво место, со што ќе ја реафирмираат посветеноста кон евроатлантските интеграции на Република Македонија, истакна портпаролот на Стејт департментот, Џон Кирби, вчера на редовната средба со новинарите на прашање за кризата во Македонија.
– Ги охрабруваме македонските лидери да го надградат напредокот што веќе го постигнаа со имплементацијата на политичкиот договор од 15 јули, кој претставува најдобар начин за излез од кризата и пат кон одржување кредибилни избори во април следната година. Партиите сега го пропуштија клучниот рок за постигнување согласност за сериозни прашања кои се однесуваат на формирање на техничка влада, заштита на „свиркачите“, како и заштита на приватноста – рече Кирби.
Според него, македонските лидери минатиот месец направиле важен чекор со назначувањето на Катица Јанева за специјална обвинителка на која сега треба да ѝ бидат дадени ресурсите и персоналот кои таа ги побара за да го исполни својот мандат.
Кирби подвлекува и дека политичките партии не треба да влијаат или да ја попречуваат нејзината работа.
– Се надеваме дека како што работните групи ги продолжија разговорите, сите страни ќе ги стават интересите на државата на преден план, реафимирајќи ја посветеноста на македонските евроатлантски интеграции – посочува портпаролот на Стејт департментот.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
