Зголемен прилив на мигранти, вчера 5.700

Во прифатниот центар за мигранти во Гевгелија изминатото деноноќие влегле 5.700 мигранти кои по евидентирањето заминале кон граничниот премин Табановце. Приливот на мигрантите се зголемил во вечерните часови поради што, покрај возови, во превозот се вклучени и автобуси и такси возила.

Од регионалниот Центар за управување со кризи во Гевгелија денеска соопштија дека по пристигнувањето на мигрантите им се дели храна и облека во куќарки за таа намена и оти на просторот пред септичката јама во кампот се монтирани корита за перење алишта кои активно се користат од страна на мигрантите.

Во помошта и донацијата на опрема, според договорот склучен со ЦУК, ќе се вклучи и ,,СОС детско село“ веднаш откако ќе добие локација за сместување во привремениот транзитен центар за мигранти.

Кетеринг службите почнаа да донираат топол оброк за мигрантите, а поради ограничениот опфат наскоро ќе се реши дали во просторот на кампот ќе има ви-фи конекција за потребите на службите и мигрантите.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.