Партиите сѐ уште без согласност за отворeните прашања

Партиските работни групи и на синоќешната рунда разговори во Клубот на пратениците не постигнале согласност околу отворените прашања од Договорот од Пржино, објави МИА.

Дел од медиумите, повикувајќи се на партиски извори, објавија дека главните несогласувања
се околу ингеренциите на новите министри и заменици-министри што треба да ги предложи
опозицијата. Според Договорот од 2 јуни и 15 јули, рокот за избор на нови министри за
внатрешни работи, за труд и за социјална политика, како и заменици-министри во ресорите
финансии, земјоделство и администрација и информатичко општество, истече ноќеска на
полноќ.

Медијаторот во работните групи, Питер Ванхауте, пред почетокот на синоќешната средба
изјави дека на маса ќе бидат законите за влада, за т.н. „свиркачи“ и за прислушуваните
материјали.

Засега нема закажано собраниска седница на која би се разгледале точки предвидени со
Договорот од Пржино.

Денеска претпладне треба да биде одржана седница на Советот за јавни обвинители, но
нема официјална потврда дека ќе се разгледува предлогот што завчера го доставила
специјалната обвинителка Катица Јанева за избор на преостанатите седум нејзини
помошници. Седницата на Советот претходно беше најавена за вчера.

Претседателот на Советот, Петар Аневски, претходно потврди дека го добил дописот од
министерот за правда Аднан Јашари, во кој по постигнатата согласност меѓу четирите
најголеми политички партии, се бара да се изберат и останатите седум обвинители во
Специјалното јавно обвинителство.

Комплетирање на тимот на Јанева е условот што го постави опозицијата за продолжување на
разговорите околу другите прашања меѓу кои и Изборниот законик, за кој, како што
информира европскиот посредник во меѓупартискиот дијалог Питер Ванахауте, е постигната
согласност.

Загриженост поради застојот во спроведувањето на политичкиот договор вчера искажаа
еврокомесарот за проширување Јоханес Хан, и американскиот амбасадор Џес Бејли.

Хан побара од партиските лидери одговорност и водење грижа за интересите на земјата и
за нејзината иднина. Бејли, пак, укажа дека е потребна политичка волја за соочување со
преостанатите прашања од Договорот од Пржино, кој, според него, е начин за да се обезбеди
отченост и да се подобрат условите за слободни и фер избори и да и се стави крај на
политичката криза во Македонија.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.