Асад, Русите и Хезболах подготвуваат голема офанзива со ново засилување!

Сириската армија и нејзините сојузници и Хезболах се подготвуваат за копнена офанзива против бунтовниците во подрачјето на Алепо со поддршка на руската авијација, соопштиле вчера двајца високи регионални офицери за Ројтерс.

Офанзивата ќе ги засили копнените напади кои ги почна истиот тој сојуз минатата недела против бунтовниците во провинцијата Хама. Тоа што е ново, како дополнително засилување, се илјадниците ирански војници кои стигнаа во Сирија да учествуваат во копнената офанзива на страната на Башар ал Асад, изјавиле анонимни официјални лица.

Големата офанзива на силите на Асад во регионот крај турската граница се претпоставува дека уште повеќе ќе ја разлутат оваа членка на НАТО која ги поддржува бунтовниците кои се борат против Асад. Турција веќе изрази длабока загриженост поради руските воздушни напади врз бунтовниците.

Контролата на градот Алепо и околните провинции е поделена меѓу сириската влада и цела низа бунтовнички групи кои се борат против Асад и против Исламската држава.

– Големите подготовки за битка во таа област се очигледни. Има голема мобилизација на сириската армија, тука се елитните борци на Хезболах и илјада Иранци кои стигнаа во фази овие денови, изјавил сириски официјален претставник. Друго официјално лице од сириската влада изјавило дека одлуката да се почне битка за Алепо е донесена и дека веќе не е тајна дека во Сирија има илјада ирански специјалци чија улога е фундаментална.

Двата анонимни извори соопштиле дека нападите ќе почнат наскоро.

Сириската влада ги контролира западните делови на градот, додека бунтовниците го контролираат истокот. Исламската држава и други бунтовнички групи вклучувајќи и групи кои се поддржани од странските непријатели на Асад, се борат едни против други северно од градот во подрачје каде Турција и САД прават планови за да ја скршат ИСИС.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.