Почнува „Кавадаречка култура есен“

Вообичаено ова време секоја година, во Кавадарци се одвива манифестацијата „Кавадаречка културна есен“, во која секојдневно се случуваат културни и уметнички настани се до средината на месец декември.

Веќе овие денови започнува интензивната културна презентација на проекти и настани од сите дејности:театар, ликовна уметност, музичка уметност, фотографија, филм, литература…

Официјалното отворање на „Кавадаречка културна есен 2015“ е во петок, на 16 октомври 2015, во Домот на културата „Иван Мазов -Климе“ со фолклорниот спектакл “Распеана чаршија“ на кој ќе учествуваат повеќе македонски фолклорни ансамбли, а истата вечер ќе биде отворена и изложба на фотографии „Кокино“.

Во предвечерјето на отворањето на манифестацијата е ексклузивниот концерт на врвните македонски музичари Страшо Темков – флејта и Марија Вршкова – пијано насловен како „Боите на звукот“, а ќе се случи во четврток, на 15 октомври со почеток во 20 часот во Галеријата при Домот на културата во Кавадарци.

Според предвидениот распоред на настани, во вторник, на 20 октомври, во салата при кавадаречкиот Дом на култура, ќе се случи премиера на новата пратстава на Театарот при Дом на култура „Иван Мазов – Климе“ Кавадарци – „Женидба“, по текст на Гогољ, а во режија на познатиот македонски режисер Драган Велјановски.

На 21 октомври, среда во Галеријата при Домот на културата ќе се одржи промоција на новиот поетски алманах на Здружението на писатели „Тиквешки цветови“ од Кавадарци, во кој со свои авторски творби се јавуваат 17 кавадаречки поети.

Почетокот на „Кавадаречка културна есен 2015“ ќе биде заокружен со Фестивалот на новиот германски филм, кој во Кавадарци, во Домот на културата ќе се одвива од 27 до 29 октомври.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.