Меѓународната антитерористичка коалиција преводена од САД, се подготвува да започне обемна офанзива во североисточна Сирија, со што би извршила директен притисок врз Рака, кој важи за „главен град на исламскиот калифат“, што го прогласи џихадистичката група Исламска држава (ИД), објави „Њујорк тајмс“.
Повикувајќи се на воени и владини извори во Вашингтон, весникот тврди дека американскиот претседател Барак Обама, минатата недела одобрил два важни чекора за подготовка на офанзивата во следните неколку недели.
Обама првпат му наредил на Пентагон дирекно да им достави муниција, а можеби и оружје, на умерените опозициски групи, кои се активни во Сирија, тврди весникот, додавајќи дека Белата куќа ја поддржала и идејата за засилување на воздушните напади врз ИД со авиони од базата „Инџирлик“ во Турција.
Според планот на Пентагон, во офанзивата против ИД би се вклучиле преку 20.000 курдски борци и три до пет илјади припадници на сириските опозициски групи, кои би добиле воздушна поддршка од десетици авиони на меѓународната коалиција.
Планот предвидува и борците на сириската опозиција да преземат контрола врз стратегиски важниот дел на сириската граница кон Турција, долг околку 95 километри, со што би се пресекол главниот канал за снабдување на ИД, наведува „Њујорк тајмс“, додавајќи дека оваа офанзива би се водела далеку од реоните во кои руските сили изведуваат воздушни напади.
– Новиот северен фронт ќе има дирекна цел да ја ослаби ИД на нејзин терен, во момент кога џихадистите контролираат големи територии, вклучително и Мосул и Рамади во Ирак и Палмира во Сирија – оценува „Њујорк тајмс“.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
