Почина Иван Митевски-Копола

Почина доајенот на телевизиската документарна програма, Иван Митески-Копола. Замина тивко без никој да го чуе, што не е својствено за неговиот живот исполнет со светлините на медиумот. Неговите филмови ја скенираа човековата душа. Болката и осаменоста, но и љубовта и разбирањето. Беше предводник на познатата скопска телевизиска документарна школа.

Си замина нашиот Копола. Во рана есен, годишната доба што најмногу ја сакаше, зашто боите на есента се вселенски и филмски.

Доајенот на телевизиската играна и документарна програма ги направи филмовите „Време на летала“, „Заминување од Пасквелија“, „Трето доба“, „Децата на светот“, „Црвениот трендафил на Скопје“. Направи и стотици документарци и ги освои бројните признанија низ светот, а документарецот „Глас“ влезе во банката на податоци на УНЕСКО. Неговите колеги велат- споменот за него се неговите дела- беше скромен и мил, бескрајно интересен и духовит човек.

-Иван Митевски-Копола всушнот е брендот – синоним за она што се нарекува континуитет и цврста основа на играната и на документарната програма во МРТ – вели режисерот Аљоша Симјановски.

-Извонреден професионалец, грижлив родител, извонредно интересен по својот филмски опус. Неговата смрт е огромна загуба за целото македонско гледалиште, за Македонската телевизија – вели Кирил Тренчевски, раководител на одделение за планирање.

Беше предводник на познатата скопска телевизиска документарна школа. Ги препознаваше младите телевизиски таленти и ги воведуваше во еснафот. Беше близок соработник на најистакнатите дејци во Македонската телевизија. Заминувањето е миг, остануваат делата. Патувај мирно и спокојно, Копола.

Извор: МРТ

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.