Груевски на Самитот на ОН: Целите за одржлив развој треба да се постигнат со здружени сили

Премиерот Никола Груевски вчера во Њујорк, САД, се обрати на Самитот на Обединетите Нации за одржлив развој.

Во обраќањето, соопшти владината прес-служба, тој ја поздрави и поддржа универзалната агенда за намалување на сиромаштијата и подобрување на благосостојбата на граѓаните, преточена во документот Трансформирање на нашиот свет: Агенда за одржлив развој 2030. Посочи дека целите за одржлив развој треба да се постигнат со здружени сили во партнерство на глобално, регионално, национално и локално ниво.

Премиерот Груевски ја истакна регионалната посветеност на земјите од Централна и Источна Европа за придонес во реализација на целите за одржливиот развој.

– Централно-европската иницијатива со која претседава Република Македонија сака да биде активно вклучена во спроведувањето на пост 2015 развојната агенда, а земјите-членки ја искажуваат својата подготвеност за конкретен регионален придонес, за преносот на знаења и размена на најдобрите практики во различни иницијативи за одржлив развој, градење капацитети на јавните институции и подигнувањето на свеста, истакна премиерот Груевски.

Претседателот на Владата потенцираше дека Република Македонија активно придонесува кон заедничките цели и дека по Конференцијата за одржлив развој во Рио де Женеиро се интегрираат принципите за одржлив развој во нашите национални политики.

– Основавме Национален совет и ја усвоивме Националната стратегија за одржлив развој. Во јули подготвивме преглед за напредокот во спроведувањето на Стратегијата што беше претставена пред Одделот за економски и социјални работи и Одделот за одржлив развој на ОН. Следен чекор е да се вклучат целите за одржлив развој во нашите стратегиски документи, вклучително и Акцискиот план за одржлив развој. Очекуваме да добиеме поддршка преку новата УНДАФ – Рамка за развој на помош при ОН 2016-2020, што се подготвува во консултации со сите релевантни страни, додаде премиерот Груевски.

Тој ја изрази активната партиципација на нашата земја во остварувањето на одржливиот развој и работата на столбовите на одржливиот развој, кои значат комплементарни активности за поддршка на социјално ранливите групи и поттикнувањето на вработувањата.

– За социјално ранливите ги зголемивме социјалните трансфери за над 50 проценти, воведени се и зголемени финансиски надоместоци за ранливи категории, а посебно за децата без родителска грижа, а работодавците ги ослободивме од плаќање давачки за плата за нивно вработување во период од 5 или повеќе години. Преку странските инвестиции и поддршката на приватниот сектор невработеноста во нашата земја е намалена за над 11 проценти. За вработување на млади лица до 35 годишна возраст, државата ги плаќа придонесите за социјално осигурување и персоналниот данок, истакна македонскиот премиер во своето обраќање.

Груевски се осврна и на активните политики и мерки кои се спроведуваат за поддршка на младите и достигнување родова еднаквост.

– За младите, буџетот за образование изнесува 5-6 проценти од БДП, на ниво на земјите од ОЕЦД. Воведени се Кембриџ наставните програми за математика и природни науки, изучувањето англиски јазик е од прво одделение, а на втор странски јазик од шесто одделение. Обезбеден е компјутер за секое дете во основните и средните училишта. Се бориме за елиминирање на сите форми на насилство против жените и девојките, особено за стопирање на трговијата со бело робје за што добиваме највисоки оценки од релевантни меѓународни институции, економскиот статус на жените го унапредуваме преку посебните програми и финансирања, поволности за вработувања на самохраните мајки, продолжување на породилното отсуство и посебните заштити на вработените мајки, како и промовирањето на зголемено учество на жените во политичкиот живот, истакна премиерот Никола Груевски во обраќањето на Самитот на Обединетите Нации за одржлив развој.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.