МВР: Таткото на бебето случајно ја видел дадилката како го малтретира детето, по што поставил камера

СВР Скопје – Одделение за малолетничка деликвенција и семејно насилство до Основно Јавно Обвинителство Скопје поднесе кривична пријава против Т.С.(61) поради постоење основано сомневање дека сторила кривично дело „запуштање и малтретирање на дете“ предвидено и казниво по член 201 од КЗ на РМ.
Пријавената во периодот од мај 2015 до 01.09.2015 година во Скопје, додека била ангажирана како негувателка задолжена за грижа за животот, здравјето и за негувањето на 9-месечно дете, го малтретирала и грубо се однесувала кон него, од што истото пројавило проблеми со врескање во ноќните часови, невеселост и нервоза.

Имено, на 20.08.2015 година, таткото на 9-месечното дете ненајавено влегол во домот и ја забележал Т.С. како го удира со рака по лицето, но не изреагирал, сметајќи дека можеби се работи за негов превид. Наредните денови поставил видеокамера во својот дом со цел да го заштити своето дете и да утврди како се грижи пријавената за него, при што на 02.09.2015 година ја извадил видеоснимката и забележал дека го малтретира и го тепа детето, грубо се однесува кон него, со викање, навредување, штипење за рацете, грубо тресење во релаксаторот и во раце, тегнење на ушите и други облици на грубо однесување.

Од страна на таткото е поднесен Записник за прием на пријава и од негова страна е доставена мемориска картичка на која е снимен видеоматеријал која со Потврда за привремено одземени предмети е одземена и дадена за Вештачење во Секторот за компјутерски криминал и дигитална форензика при МВР на РМ за што е изготвен извештај за компјутерска опрема.

На 09.09.2015 година извршен е разговор со Т.С. во кој истата го негирала извршувањето на кривичното дело.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.