Почетокот на работното време пред девет часот наутро е мачење за луѓето

Британските експерти за спиење и сон објавиле нова студија во која тврдат дека работното време што почнува пред девет часот за луѓе до 55 години е еднакво на мачење.

Присилување на работниците да работат од девет до 17 часот е исцрпувачки и стресно, резултира со недостаток на сон, тврди доктор Пол Кели кој го водел истражувањето.

– Не може да го промениме нашиот 24-часовен биоритам. Не може да се научите да се будите во одредено време. Вашето тело е хармонизирано според сонцето, а Вие не сте свесни за тоа бидејќи за тоа известува хипоталамусот, а не видот. Ова се однесува на затвори и на болници, бидејќи луѓето таму ги будат рано и им даваат храна која не ја сакаат. Лишување од сон е мачење – вели Кели.

Општеството мора да го смени почетокот на работното време на работа и во училишта, за да се усклади со биоритмот на луѓето. Фирмите кои ги присилуваат своите работници да работат рано, го нарушуваат нивниот биоритам и со тоа настануваат здравствени проблеми кај вработените.

– Работното време треба да биде од 10 часот, а од девет дури откако ќе наполните 55 години. Вашиот црн дроб и срце имаат различни ритми, а вие ги присилувате да ги менуваат. Тоа е меѓународен проблем. Сите патат, а не мораат – изјави Кели.

Недостаток на сон влијае на памтењето, поттикнува користење дрога и алкохол, поттикнува анксиозност, фрустрација, импулсивно однесување, дебелеење, висок крвен притисок, стрес…

– Децата треба да доаѓаат на училиште околу 11 часот за да бидат наспиени и опуштени – додава тој.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.