Пуштено во употреба првото средно училиште во Шуто Оризари (фотогалерија)

Министерот за образование и наука Абдилаќим Адеми, заедно со премиерот Никола Груевски, го пуштија во употреба средното училиште во општина Шуто Оризари. Целата инвестиција за изградбата и опремувањето на училиштето изнесува  85.000.000 денари. Станува збор за првото средно училиште кое е изградено на територијата на општина Шуто Оризари.

– Изградбата на ова училиште во голема мерка ќе им помогне на средношколците кои живеат во овој дел на Скопје. Наместо да патуваат до средните училишта кои се наоѓаат во другите општини во главниот град, образованието ќе можат да го продолжат во непосредна близина на нивните домови – рече Адеми.

Во средното училиште во Шуто Оризари ќе има повеќе струки и профили. Срдношколците можат да се определат за здравствена струка, (образовен профил медицинска сестра), градежно – геодетска струка (образовен профил градежен техничар), угостителско – туристичка струка (образовен профил келнер), економско – правна и трговска струка (образовен профил економски техничар) и лични услуги (образовен профил фризер).

Новото училиште се протега на површина од 4405 метри квадратни.  Во склоп на новата зграда се наоѓа и училишната библиотека во која учениците ќе можат да ги најдат сите лектири, како и дополнителна литература со која ќе можат да го надградат своето знаење. Наставата по физичко образование, ќе се одвива во нова и комплетно опремен спортска сала. Во училиштето, настава  ќе можат да следат 400 ученици во една смена.

Министерот Адеми и Премиерот Груевски денеска ги постија и доградените објекти на двете основни училишта во општина Шуто Оризари-„ Браќа Рамиз и Хамид“ и „26 јули“ .

Адеми додаде дека Владата на Република Македонија дала согласност да се гради средното училиште во општина Сарај и дека наскоро се очекува и тоа да се пушти во употреба.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.