Европската унија преку Европската комисија, денеска го поздрави враќањето на избраните пратеници на опозициската СДСМ во македонското Собрание, што е според договорот од 2 јуни и протоколот од 15 јули, јави дописникот на МИА од Брисел. Официјален Брисел, исто така, испрати порака дека многу одблиску го следи развојот на настаните и очекува прогрес во однос на изборот на Специјалниот обвинител, чијшто краен рок е за две недели.
– Ние го поздравуваме фактот дека опозиција сега е вратена во парламентот. Знаете дека ова е дел од договорот посредуван од Европската унија, што беше постигнат во јуни и јули оваа година. Многу е важно овој договор да се исплементира и ние сега очекуваме парламентот да работи на реформските приоритети во интерес на целата земја, порача портпаролката на Еврокомиијата – Маја Коцијанчич.
Во однос на проблемите при изборот на Специјалниот обвинител и можноста да се пробие крајниот рок, а тоа е 15 септември, гласноговорничката на еврокомесарот за преговори за проширување, Јоханес Хан, со дециден одговор дека Брисел очекува прогрес на ова поле.
– За прашањето за Специјалниот обвинител, работата на ова сè уште се одвива и ние очекуваме партиите да ги задржат и спроведат сите обврски. Еврокомисијата и посебно комесарот Хан го следат ова многу одблиску и ние очекуваме прогрес, исто така, и на ова поле – истакна Коцијанчич.
Како што претходно порачаа од неформалната влада на Европската унија, роковите за избор на Специјален обвинител, како и на министри во македонската Влада што ќе ги предложи опозициската СДСМ, заклучно со одржувањето на предвремените парламентарни избори на 24 април 2016 година, се јасни и прецизни и не смее да се пробиваат од ниту една од четирите партии (ВМРО-ДПМНЕ, СДСМ, ДУИ и ДПА), чиишто лидери го потпишаа договорот на 2 јуни и на 15 јули, со кој се стави крај на политичката криза во Македонија.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
