ЕК: Балканот ја има поддршката од ЕУ, но не и за изградба на прифатни центри

Брисел сака да ги поддржи земјите од Балканот во решавањето на проблемот со приливот на мигранти, но изградбата на масовни центри од страна на ЕУ не е планирана ниту во Србија, ниту во која било друга земја, изјави денеска за виенскиот весник „Пресе“ портпаролот на претставништвото на Европската комисија во Австрија, Хајнц Мико.

Според него, можна е финансиска поддршка од средствата на ЕУ за решавање на „најитните хуманитарни потреби“. – Но, за тоа за што конкретно ѝ е потребна поддршка, српската влада мора прво да ја информира Европската комисија – рече тој.

Меѓутоа, како што истакна, не е планирана изградба на масовен центар „ниту во Србија, ниту во некоја друга земја од регионот“.

Претседателот на српскиот собраниски Одбор за одбрана и безбедност, Момир Стојановиќ, вчера за весникот „Блиц“ изјави дека во Србија наскоро може да се појави центар за 400.000 азиланти, а министерот за труд, вработување, боречки и социјални прашања, Александар Вулин, истакна дека градбата на еден таков центар ниту е во план, ниту е можна.

-Бидејќи ЕУ нема решение за големиот проблем со мигрантите, една од можностите е да ја финасира изградбата на големиот центар . Се шпекулира дека ЕУ сака таков центар некаде на Балканот, а дека има големи шанси тоа да биде токму во Србија. Исто така, се зборува дека локацијата за центарот би била некаде на југот од Србија и дека таквиот град за азиланти најверојатно би бил од монтажен тип- рече Стојановиќ за „Блиц“.

Коментирајќи ги овие наводи, Вулин изјави дека во Србија нема да се гради центар „ни за 400.000, ни за 4.000 мигранти“ бидејќи тоа не е политика на земјата. Тој додаде дека никој не го барал тоа од Србија, а и да го побарал, Србија никогаш не би прифатила.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.