Уште 25 семејства со социјален ризик добија покрив над глава

Премиерот Никола Груевски, директорот на Акционерското друштво за изградба и за стопанисување со станбен и со деловен простор Цветко Грозданов и градоначалникот на Демир Хисар Љупчо Блажевски, ја пуштија во употреба новата станбена зграда со 25 стана, наменети за лица со социјален ризик и за други ранливи категории, инвестиција вредна околу 33 милиони денари.

Зградата, според премиерот Груевски, е одраз на заложбите за подеднаква грижа и еднаков економски и социјален развој во сите делови од државата.

– Принципите на хуманост, социјална правда и на солидарност се едни од основните начела на кои е поставена политиката на Владата на Република Македонија. Во тој дух, покрај борбата за што побрз економски развој на земјата, привлекување инвеститори, отворање нови работни места, зголемување на социјалната помош и подигање на стандардот на социјално најзагрозените граѓани, продолжуваме со разни мерки за олеснување на животот токму на најпогодените граѓани во земјава – рече Груевски.

Владата, посочи тој, е свесна за потребата од оваа поддршка за Демир Хисар, особено ако се земат предвид податоците за бројот на граѓани во општината кои се наоѓаат во социјален ризик и имаат големи социјални потреби.
– Токму затоа, знаејќи дека не е мал бројот на граѓани штонемаат можност да градат или купат сопствен стан ја изградивме оваа зграда, која ќе им помогне на 25 семејства да го остварат сонот за свој дом – нагласи Груевски.

Покрај зградата во Демир Хисар, за социјалните категории граѓани вакви објекти се изградени во Скопје, Кичево, Македонска Каменица, Охрид, Кочани, Кавадарци, Крива Паланка, Штип, Битола, Берово и Ресен. Во фаза на градба се две згради во Прилеп и Македонски Брод, а наскоро ќе почнат со градба уште два објекти во Кочани и во Гостивар. Тие згради, подвлече Груевски, се дел од проектот на Владата за изградба на 2.500 социјални станови, станови за млади брачни парови, за лица со ниски примања, за деца без родители и за комерцијална продажба.

Распределбата на становите, додаде, ќе се одвива електронски, процес кој ќе почне овој месец и кон средината на септември се очекува Министерството за транспорт и врски да ја заврши постапката.

Премиерот Груевски потсети на дел од реализираните проекти во Демир Хисар, меѓу кои водоводот во селото Стругово, патот од Суводол до манастирот „Пресвета Богородица“, локалниот пат Стругово – Загориче, изградба на пат за селото Брезово, пат од Радово до манастирот „Св. Атанасиј“ во село Сопотница, реконструкција на регионалниот пат Демир Хисар за Бучим, изградба на повеќенаменски игралишта, реконструкција на градскиот водовод во Демир Хисар… За наредниот период најави асфалтирање на локалниот пат за манастирот „Св. Петар“ во Смилево, реконструкција на улици во селото Суводол, реконструкција на водовод во селото Слепче, реконструкција на градскиот стадион во Демир Хисар…

– Сите овие проекти, но и многу други кои следуваат во наредниот период се јасен сигнал дека нѐ чека уште многу работа и уште многу проекти што се знајни за жителите на општина Демир Хисар – нагласи Груевски.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.