Потешко повредено 6-годишно дете прегазено од „БМВ“

Шестгодишно дете од Куманово било потешко повредено во сообраќајна незгода што се случила вчера околу 18 часот на булеварот „Видое Смилевски-Бато“ во Тетово, информираше денеска портпаролот на СВР Тетово Марјан Јосифовски.

Според неговите информации во несреќата автомобил „БМВ“ со швајцарски регистарски таблички управуван од Л.Ф.(26) го удрил детето кое пешки го преминувало булеварот.

-Од ударот детето се здобило со скршеница на десната натколеница и повреди на главата и по укажаната права помош во тетовската клиничка болница било префрлено на скопските клиники, каде било задржано за натамошно лекување, рече Јосифовски.

Тетовската полиција по овластување на јавниот обвинител извршила увид на местото од сообраќајката и според првичните информации причина за несреќата е невнимателно преминување на улицата од страна на детето.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.