Убиените во Козле воделе удобен живот, а не работеле ништо

]Полицијата истражува зошто убиецот од Козле, кој одзеде два живота, ги одвртил светилките во куќата во кои го извршил убиството.
Новите информации од истрагата говорат дека светилките во долниот кат од куќата каде што пред два дена беа убиени Самет С. (29) и неговата мајка Ѓулчин Е. (52), биле одвртени.

Полицијата се сомнева дека на тој начин убиецот сакал да добие во време или, пак, биде сигурен дека ќе биде темно кога ќе го изврши убиството. Мајката и синот од Бурса, Турција, биле убиени со по еден куршум во главата, а врз нивните тела било истурено брашно. Од кои причини и која е симболиката ќе покаже истрагата.

Според најновите информации мајката била убиена додека спиела, додека нејзиниот син бил усмртен до креветот, додека се преоблекувал откако со сопругата се вратиле од прошетка во 1.30 часот по полноќ.

Тоа што полицијата го потврдува е дека двојното убиство во Козле е извршено на професионален начин, најверојатно од еден сторител. Во мајката и во синот било пукано од пиштол со придушувач.

На вештачење во полицијата е однесен автомобилот „БМВ“ со кој на 20 месецов турските државјани влегле во Македонија. Во автомобилот со нив бил и братучед на убиениот, кој по една недела престој кај сватовите, побарал да му повикаат такси до скопскиот аеродром бидејќи морал итно да се врати во Турција, по што си заминал.

Убиените, пак, според неофицијални информации, воделе удобен живот, а не работеле нешто. Македонската полиција сè уште ги чека информациите од турските колеги, кои ги проверуваат починатите лица.

Тоа што е веќе познато е дека телата на убиените биле пронајдени утрината во 5.15 часот од домаќините. Сопругата на убиениот, со кого пред неколку месеци стапила во брак, и нејзините родители ги поминале полиграфските тестирања.

Истрагата продолжува со цел пронаоѓање на сторителот и целосно расчистување на двојното убиство во Козле.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.