архива
Коњаниците од Горно Лисиче денеска попладне ќе го започнат „Илинденскиот марш 2015“ кој ќе заврши на 2 август во Крушево, на прославата на најголемиот македонски национален празник – Илинден.
Градоначалникот на општина Аеродром Ивица Коневски на коњаниците ќе им го предаде општинското знаме во паркот „Јане Сандански“, со што официјално стартува 37-от традиционален коњички марш што го организира Здружението на граѓани од Горно Лисиче „Илинденски марш 1978“.
Коњаниците придружувани од фаланга составена од дваесетина членови, игроорци од КУД „Никола Јонков Вапцаров“, со звуците на зурлите и тапаните ќе се упатат кон црквата „Свети Петар и Павле“ во Горно Лисиче, минувајќи низ главните булевари на општината.
Пред испраќањето на коњаниците од Горно Лисиче, кои се на возраст од 15 до 60 години, во црквата „Св. Петар и Павле“ ќе се одржи свечена литургија, на која високи свештеници од Македонската православна црква ќе им дадат благослов на патот кон Крушево. Пред испраќањето на илинденците ќе се организира музичка програма каде ќе настапат познати македонски естрадни уметници.
Во испраќањето на коњаниците кон Крушево, ќе се вклучи и Општинската организација на Црвениот крст „Кисела Вода“, која во дворот на црквата „Св. Петар и Павле“ во Горно Лисиче ќе одржи крводарителска акција.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
