Мелничарите не се во состојба да исплаќаат повеќе од девет денари за килограм пченица која не ги исполнува параметрите за квалитет согласно Правилникот, наспроти увозот на евтино брашно од соседството кое се продава по 14 денари и со што практично, се уништува секторот, реагира денеска Групацијата на мелничко-пекарската индустрија при Стопанската комора на Македонија.
Според Групацијата, цената од 11 денари која се презентира од страна на Министерството за земјоделство, шумарство и водостопанство по заедничкиот состанок на производителите и преработувачите минатата недела, се однесува исклучиво за пченица која ги исполнува сите параметри пропишани со Правилникот за квалитет со цел производство на брашно за исхрана.
– Цената од 11 денара значи 10 денари за килограм откупена пченица без ДДВ и транспорт. Секоја друга пченица, која ќе биде понудена за продажба, а нема да исполни макар и еден параметар согласно Правилникот, ќе се откупува по 8, односно по 9 денари за килограм, без ДДВ и транспорт- наведува Групацијата.
Пченицата за која мелничарите ќе плаќаат 10 денари по килограм (без ДДВ и транспорт), а Министерството ја претставува како 11 денари, мора, како што се додава во соопштението, да ги исполнува следните стандарди: хектолитри над 76, влага максимум 12 отсто, примеси најмногу два процента, енергија минимум 60 сантиметри квадратни, број на паѓања по Хагберг најмалку 250, односен број од 1,4 до 2,4, протеини минимум 12, влажен глутен најмалку 24, седиментација минимум 30, степен на отпуштање најмалку 100 и растегливост минимум 130.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
