Низ прстен те гледам, во срце да ти влезам

Желбата на Билјана Гегоска (29) утре, на Петровден, 12 јули ќе биде исполнета. Таа утре од прозорецот на куќата во Галичник ќе го чека својот избраник, Филип Белчев (26) и со бурмата во рака ќе рече „Низ прстен те гледам, во срце да ти влезам“.

– Едно нешто знаев од секогаш. Дека ќе се венчам во црквата „Свети Петар и Павле“. Може и да не бидам галичка невеста, но венчавката од секогаш знаев дека ќе биде во оваа црква – вели Гегоска.

Гегоска и Белчев се овогодишните невеста и зет на 42. Галичка свадба, која на 11 и 12 јули ќе се одржи во Галичник во рамки на „Галичко лето 2015“.

Гегоска (29) има галичко потекло и е многу среќна што конечно ќе биде невеста на манифестацијата на која досега учестувала многупати, како дел од целата церемонија. Таа по професија е дипломиран правник и работи во приватна градежна компанија. Белчев (26) е професор по македонски јазик и во моментов е невработен.

– Отсекогаш, од мала, кога сум се замислувала како невеста, тоа никогаш не била венчаница во бела боја, туку галичната невестина руба. Чувствувам голема возбуда и среќна сум што ќе бидам галичка невеста. Носијата е тешка, но се чувствувам убаво. За мене и за моето семејство улогите во свадбата не се наметнати туку ние навистина ги доживуваме – вели Гегоска.

Зa Филип чест е, вели, да се биде дел од оваа традиционална манифестација и да се прави свадба според традиционалните обичаи.

– Огромна чест за мене како Македонец е тоа што ќе бидам дел од оваа свадба – вели Белчев.

Геговска потекнува од галичко семејство, а нејзиниот татко е сопственик на коњичкиот клуб „Бистра“ од Галичник.

– Токму поради тоа немавме проблеми со обуката на невестата и на зетот бидејќи и двајцата се искусни јавачи и може да ги исполнат сите барања во однос на самите свадбарски обичаи – вели Митре Аџиевски, претседател на Месната заедница Галичник.

Гегоска и Белчев на 5 септември ќе имаат и класична свадбена веселба.

– Учестувавањто на галичката свадба го чувстувам како чекорење по нашите предци. Јас сум израсната во ова село и со оваа манифестација. И кога невестата преку прстен го гледа младоженецот и вели „Низ прстен те гледам во срце да ти влезам“, јас тоа навистина го чувстувам – вели идната галичка невеста.

Галичката свадба која е основен белег на Галичкото културно лето обединува над 30 свадбени обичаи карактеристични за мијачкиот крај од кои повеќето и денес се изведуваат за време на свадбени веселби.

Свеченоста почнува со канење на мртвите на Петровден, рано наутро, в недела, потоа канење на кумот. Следува бричење на зетот, каде што стариот побратим го бричи зетот. Се тргнува по невестата, а на чело е бајрактарот качен на коњ. Откако ќе пристигнат стројниците, зетот им бакнува рака на своите и на роднините на невестата. На зетот му се става риза на рамото и следува строевање на девојката. Свекрвата од дисазите ги вади подароците, а девојката и бакнува рака. Се товарат ковчезите, а девојката облечена во невестинска носија се качува на коњ.

Свекрвата со сито погача и бокал со вино ја пречекува невестата. Таа трипати се врти околу невестата удирајќи ја со лебот по глава. Венчавањето е во црквата „Свети Петар и Павле“.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.