Авторска вечер со Роберт Перишиќ во Паркот на франкофонијата

Во рамките на резиденцијалната програма за книжевници под мотото „Апсолутно модерен“, во организација на издавачката куќа „Готен“, а под покровителство на Европската мрежа за книжевност и книги Традуки и Град Скопје во март во Скопје престојуваше Роберт Перишиќ.

Роберт Перишиќ, кој е роден во 1969 година во Сплит, е еден од најнаградуваните и најпреведуваните хрватски автори од средната генерација. Автор е на седум книги, од кои првите две збирки раскази веќе во почетокот на 2000 година му обезбедија читателска публика и преводи на словенечки, српски, чешки и унгарски.

Негова досега најуспешна книга е „Нашиот човек на теренот“ (2007), која се здоби со две книжевни признанија и беше преведена на многу јазици, меѓу кои и на македонски, во 2010, година, во издание на „Македонска реч“. Книгата ја доби наградата Роман на годината на „Јутарњи лист“ и наградата на Шпаркасе банката во Грац, Австрија.

Освен проза, Роберт Перишиќ пишува и драми, Културата во предградието за театарот „Гавела“, и сценарио за филмот 100 минути слава во режија на популарниот Далибор Матаниќ. Инаку, јавноста го знае Роберт Перишиќ како долгогодишен книжевен критичар.

Меѓу другото Перишиќ е основач и програмски директор и на хрватскиот меѓународен книжевен фестивал, Лит Линк и иницијатор на кампањата „Право на професија“, покрената за подобрување на статусот на писателите во Хрватска.

Најновата книга на Перишиќ „Подрачје без сигнал“ беше објавена во март 2015 година и веќе добива солидни оценки. На повеќе од четиристотини страници, Перишиќ дава една широка фреска за воените и транзициските судбини на мноштво ликови од едно мало босанско гратче Н. Напишана во духот на Андриќевите хроники, со дискретна иронија, Перишиќ ја разоткрива трагедијата на малите јунаци, до кои и сега, во малите провинциски гратчиња достигаат криминалните посредници на големите белосветски играчи.

Перишиќ во Скопје работеше на новиот роман – краток роман од 120 страници, со фокус на јунакот кој се наоѓа во „празно поле“ откако му се распаднал дотогашниот живот.