Туристичкиот пазар во Македонија стабилизиран, се зголемува бројот на резервации

Туристичкиот пазар во Македонија се стабилизира. Нови откажувања на аранжманите нема, напротив, се зголемува бројот на резервации, рече денеска директорот на Агенцијата за промоција и поддршка на туризмот Кристијан Џамбазовски.

Одговарајќи на новинарски прашања по прес-конференцијата за престојот на италијанските моторџии во земјава, Џамбазовски нагласи дека резултатите од првиот квартал годинава се позитивни. Бројот на странските туристи во периодот јануари – март 2015 во однос на истиот период лани е зголемен за 14 отсто, а евидентиран е и раст на бројот на ноќевања на 9,6 проценти.

– Додека има турбуленции во политичката сфера, туризмот прв ги чувствува негативните ефекти, а тие понатаму се одразуваат врз целата економија – истакна Џамбазовски, изразувајќи уверување дека нови турбуленции во туризмот нема да има.

Агенцијата континуирано работи на реализација на годинашните програмски активности.

– Од почетокот на годинава ги презентиравме туристичките потенцијали на 15 интернационални саеми за туризам каде што учествуваа преку 25 туристички агенции и туроператори од Македонија, што е доказ дека квалитетот, односно конкурентноста на понудата е зголемена. Продолжуваме со агресивна медиумска кампања, како и со организација на студиски посети и информативни патувања во земјава при што можност да се запознаат со потенцијалите на земјава имаат туроператори од Америка, Русија, Шведска , Фрацнија…- рече директорот.

Реализирани се, додаде, бизнис состаноци со македонското туристичко стопанство, а во повеќе француски, австралиски, италијански списанија се објавени репортажи за Македонија како туристичка дестинација.

– Во согласност со заклучоците од вонредната седница на Советот за туризам при Агенцијата, преземени се дополнителни мерки со засилено присуство на регионалните пазари преку организација на денови на македонскиот туризам во соседството и организирање дополнителни информативни патувања за странски туроператори и новинари – информира Џамбазовски.

Најголем број туристи во првите месеци од годинава има од Грција, Србија, Бугарија и од Турција

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.