Иванов на „Самит 100“ во Порторож, Словенија

Претседателот на Република Македонија, Ѓорге Иванов престојува во работна посета на Република Словенија, каде во рамките на Брдо Бриони процесот, ќе учествува на „Самит 100 – Бизнис лидери во Југоисточна Европа“ што ќе се одржи во Порторож.Македонскиот претседател ќе има обраќање на панелот на лидерите на тема „Нов договор за нова ера“, а ќе учествува и на состанокот на лидерите од Брдо Бриони Процесот со членовите на Бордот на директори на „Самит 100“.

Главната тема на дискусија на годинешниот самит е улогата на главните градови во регионот со цел инклузивен и оддржлив развој, а во соработка со државните институции, бизнис заедниците и Европската комисија.
На „Самитот 100“ предвидено е учество на претседателите на Хрватска, Косово и Црна Гора, Колинда Грабар-Китаровиќ, Атифете Јахјага и Филип Вујановиќ, на претседавачот на Претседателството на Босна и Херцеговина Младен Иваниќ и на српскиот министер за економија Жељко Сертиќ.
Во рамки на посетата, предвидени се и билатерални средби на македонскиот претседател.
„Самитот 100“ се одржува по четврти пат и на него учествуваат бизнис лидери и истакнати претприемачи и стопанственици од Југоисточна Европа. Досега овој самит беше одржан во Србија во 2011 година, во Црна Гора во 2013 година и во Хрватска во 2014 година, а покровител на четвртиот самит во Порторож е претседателот на Словенија, Борут Пахор

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.