Груевски и владината делегација на молебенот во црковната базилика „Сент Клименте“ во Рим (фото)

Претседателот на владата на Република Македонија Никола Груевски заедно со владината делегација во која се министерот за надворешни работи Никола Попоски и министерката за култура Елизабета Канческа Милевска присуствуваа на молебенот кој се одржа во црковната базилика „Сент Клименте“ во Рим по повод чествувањето на 24 мај­- Денот на сесловенските просветители Свети Кирил и Методиј.

Со молебенот на гробот на Свети Кирил чиноначалствуваше поглаварот на Македонската православна црква, Охридска архиепископија г.г Стефан заедно со претставниците од светиот синод, владиката епископ Хераклејски Климент и митрополитот на Европската епархија Пимен.

Молебенот беше дел од овогодинешната прослава и одбележување на делото на просветителите Св.Кирил и Методиј, со што владината делегација ја заврши својата посета на Рим и Ватикан.

– Во Ватикан се сретнав со поглаварот на римокатоличката црква папата Франциск, при што ги истакнав стратешките правци и приоритети на Република Македонија, предизвиците на државата, и секако го поканив да ја посети Република Македонија. Потоа имав средба со државниот секретар на Ватикан кардиналот Пиетро Паролин, кој според функцијата практично е вршител на должноста премиер, со кој што ги потврдивме одличните односи меѓу Ватикан и Република Македонија – изјави Груевски.

Премиерот Груевски истакна дека Република Македонија со должно внимание го чествува делото на светите браќа Кирил и Методиј и нивната значајна просветителска улога и дејност. ­

– Престојот го завршуваме со молебен на гробот на Св. Кирил каде заедно со црковната делегација присуствуваме и одадовме почит на Свети Кирил и Методиј за нивното дело од кои што генерации и генерации на Македонци, и не само Македонци и други граѓани на многу држави кои што го примиле нивното учење, имаат полза и напредок – нагласи тој. Архиерејот на МПЦ ОА г.г Стефан по молебенот во својот говор нагласи дека поради нивното дело светите браќа Кирил и Методиј се почитувани и од христијани и луѓе кои не се од христијанска вероисповед, и од македонскиот и од словенските и од други народи, и од верници и од неверници, затоа што нашиот и многу други народи ја разбраа вистината преку разбирливиот јазик, писмо и проповед. ­

– Нивниот единствен мотив бил да ја следат Христовата порака упатена кон неговото вознесение. Одете и научете ги сите народот кршетавјќи ги во името на отецот, синот и светиот дух, и учејќи ги да пазат се што сум ви заповедал, е пораката по која се движеа светите браќа Кирил и Методиј – истакна г.г Стефан.

Тој се заблагодари за закрилништвото на Свети Кирил. ­ Тука сме и денес пред твоето вечно почивалиште да ти искажеме признание и љубов и од оваа македонска генерација за постојаното молитвено закрилништво и застапништво пред Бога за нашиот македонски народ и за нашата, твоја и Светиклиментова Црква, истакна поглаварот г.г Стефан.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.