Овациии за „Животот на Молиер“ на МНТ во Анталија

Македонскиот народен театар имаше две изведби на претставата „Животот на Молиер” на сцената на Турскиот национален театар – Државен театар во Анталија.

Во Турскиот национален театар – Државен театар од Анталија, во рамките на 6-тото издание на Интернационалниот театарски фестивал, на 22 и 23 мај Македонскиот народен театар пред турската театарска јавност ја изведе претставата „Животот на Молиер“ од авторот Михаил Булгаков, а во режија на Александар Поповски, која беше пропратена со овации и стоечки аплаузи. Уште пред претставата имаше огромен интерес кај публиката и медиумите.

Двете претстави беа целосно распродадени. Според сите оценки „Животот на Молиер“ е една од најдобрите претстави на фестивалот, а екипата се враќа со прекрасни впечатоци и импресии.

Ова беше едно значајно гостување на Македонскиот народен театар и претставување на македонската култура.Фестивалот се одржува од 17-27 мај 2015 год. во организација на Турскиот национален театар – Државен театар од Анталија. Во рамките на фестивалот, освен ансамблот на МНТ, настапуваат реномирани театри од: Индија, Русија, Романија, Норвешка, Франција, Турција.

Целта на фестивалот е воспоставување на соработка помеѓу Турскиот државен театар и националните театри од целиот свет како и развивање на долгорочни и креативни односи помеѓу театрите инспирирани од традицијата а кои се стремат да бидат иновативни.Фестивалот е пропратен со работилници, отворени настапи како уличен театар, балетски претстави и концерти.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.