„Република“ меѓу жителите на Долно Насеље – Владата вети целосно обесштетување за уништените домови

„Република“ и денеска беше во Куманово. Во Долно Насеље разговараше со сопствениците на оптетените куќи и автомобили. Велат не знаеле за она што се подготвува. Да биле информирани, ќе ги однеле своите жени и деца надвор од населбата. Соговорниците, главно од албанска националност, велат дека со години живеат тука и постои соживот со Македонците во овој град. Тие немаат никаква поврзаност со лицата кои беа приведени и убиени во престрелката со полицијата. МВР во куќите каде што беа фатени терористите затече оружје и униформи на УЧК.

Владата формираше комисија за процена на оштетувањата на недвижниот и на движниот имот во местото каде што се одвиваше акцијата, која во рок од 7 дена треба да излезе на терен и да подготви и да ѝ достави извештај за процената на штета. Комисијата е составена од претставници на Владата и Општина Куманово. Владата зазема став да се изврши обесштетување на недвижниот и на движниот имот во висина од 100% од проценетата штета наведена во извештајот од комисијата.

На семејствата чиишто домови се оштетени во акцијата во мерка која не дозволува услови за престој во нив, Владата одлучи да им се обезбеди сместување во време на периодот потребен за санација на нивните домови или, пак, во истиот период додека трае санацијата да добиваат финансиски надомест за закуп на простории (кирија) за живеалишта. Владата одлучи на овие семејства да им додели и првична еднократна хуманитарна помош во висина од 100.000 денари по единица оштетен дом во мерка која не дозволува услови за престој.

Бафтир Рамазан, 50 години, гледа во својот автомобил кој настрадал за време на престрелките на полицијата со терористите на 9 и 10 мај во Куманово. МВР  уапси 30 лица под обвинение за тероризам. Загинаа осум полицајци,  37 се ранети. Според официјалните податоци, убиени се над 14 терористи.

Саби Асани, 60 години, стои меѓу урнатините од уништена куќа во соседството каде што македонската полиција разби голема терористичка група која подготвувала напади во Македонија

Метус Јашари, 71 година, пред својот уништен дом во Диво Насеље

Азим Ибрахими, 70 години, неговата куќа е уништена.  Ја изградил неговиот син кој работел во Швајцарија изминатите 20 години

Дете од Диво Насеље се движи низ урнатините по саботната престрелка меѓу полицијата и терористите

Наксие Јашари, 43 години, гледа низ прозорецот од нејзината уништена куќа во Долно Насеље

Наксие Јашари, 43 години, седи пред нејзината уништена куќа во Долно Насеље

Шабан Јашари, 51 година, пред својата куќа уништена во престрелките меѓу полицијата и терористите.

Девојче трча низ дворот од нејзината уништена куќа

Пријателите разговараат со Шабан Јашари, 51 година, пред неговата разурната куќа

Фото: Ѓорги Личовски (РЕПУБЛИКА)

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.