На денешниот Конгрес во Куманово Никола Груевски во својот отчет за сработеното во изминативе четири години, со прецизни бројки ги образложи постигнатите резултати, потенцирајќи дека ВМРО-ДПМНЕ на дело покажала дека може да обезбеди перспектива за граѓаните на Република Македонија.
–Високиот економски раст е основниот начин за зголемување на вработеноста и подобрувањето на животниот стандард на граѓаните. Најважниот услов за тоа да се случи е континуираното унапредување на поволната бизнис клима и одржувањето на вкупните трошоци за работа на компаниите меѓу најниските во Европа, натамошното подобрување на инфраструктурата и правната сигурност, како и подобрување на знаењето и вештините на работната сила стекнати во образовниот процес, рече Груевски.
Политиките кои Владата предводена од ВМРО-ДПМНЕ, нагласи тој, успешно ги спроведуваше во изминатиот период, овозможија да се остварат најдобрите економски резултати во независна Македонија.
–Македонија оствари втор највисок економски раст во Европа во 2013та и во 2014 година! минтата година оствари раст на БДП од 3,8%, И во 2015 година се очекува да оствари втор највисок раст на БДП од 3,5%, истакна тој.
Индустриското производство, додаде Груевски, континуирано расте 18 месеци по ред.
–Во 2014 година бруто-инвестициите достигнаа историски највисока стапка од 30,6% од БДП. Во однос на 2006 кога истите изнесуваа 20,5%, бруто инвестициите се повисоки за 10 процентни поени. Македонија, според сите меѓународни статистики, е со ниско до умерено ниво на задолженост и во делот на државниот долг и во делот на надворешниот долг.Во март 2015 државниот долг изнесува 36,0% од БДП, а јавниот долг изнесува 43,6% од БДП, истакна Груевски.
Тој додаде дека девизните резерви во март 2015 година достигнале 2.355 милиони евра и во однос на 2006 година се зголемени за скоро милијарда евра (938 мил. евра). Девизните резерви во 2014 обезбедуваат 5,3 месечна покриеност на увозот на стоки и услуги.
–Извозот во 2014 година изнесува 3.723 милиони евра и е зголемен за 15,9%, односно 511,2 милиони евра споредено со 2013 година. Тоа е историски највисоко ниво на извоз од осамостојувањето на Република Македонија. Во првите два месеци од 2015 година извозот изнесува 590,6 мил.евра што е за 14,4% повеќе во однос на истиот период во 2014, истакна Груевски.
Во 2014 година извозот само ТИРЗ, како што нагласи Груевски, достигнал скоро 1,2 милијарда евра, што претставува раст од 52,6% споредено со истиот период од 2013 година и сочинува над 31,4% од вкупниот извоз.
– Во првите три месеца од 2015 година извозот од ТИРЗ достигна скоро 322 мил. евра, што претставува раст од 27,8% споредено со истиот период во 2014 година, рече тој.
Додаде и дека вкупните депозити во март 2015 година забележаа раст од 8,4%, при што денарските депозити растат со стапка од 11%, како и дека Растот на вкупните кредити изнесува 9,2% на годишна основа.
Премиерот истакна и дека од 2011 година до сега за земјоделците издвоиле, исплатиле и исплаќаат 670 милиони евра за земјоделските субвенции.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
