Лидерот на светскиот пазар за електрични автомобили, американската компанија „Тесла моторс“, продолжува да ги фасцинира љубителите на ваков вид автомобил. Новиот модел, кој го претстави на интернационалниот Саем за автомобили во Њујорк, претставува вистински бум. Првпат е произведен сериски автомобил со два електромотора кои силата ја пренесуваат на двете оски. Новиот „модел С 70Д“ ќе го замени досегашниот веќе докажан С 60, кој има погон само на задните тркала и чијашто продажна цена изнесуваше 71.000 долари. Цената на „модел С 70Д“ порасна на 75.000 долари, што и не е голема разлика ако се земе предвид дека силата се пренесува на двете оски и има два електромотора кои во комбинација испорачуваат неверојатни 520 коњски сили.
Моделот во заминување С 60 го придвижуваше само еден електромотор со 384 коњски сили.
Покрај зголемената сила, „модел С 70Д“ го карактеризира и значително подобрена автономија меѓу две полнења на батеријата, чијшто капацитет сега изнесува 70 киловат-часови.
Автомобилот со едно полнење на батеријата сега може да помине 386 километри со сите запалени внатрешни уреди, додека постариот модел С 60, кој има батерија од 60 киловат-часови, може да помине максимални 335 километри.
Со зголемената сила овој автомобил има и подобри перформанси. „Модел С 70 Д“ од 0 до 100 километри на час забрзува за 5,2 секунди, а максималната брзина изнесува 225 километри на час. Моделот С 60 до 100 километри на час забрзува за 5,9 секунди, а неговата максимална брзина изнесува 190 километри на час.
Батеријата може да се полни и на 110-волтна мрежа и преку 240-волтна мрежа за да се задоволат потребите на сите купувачи низ светот. За едно полнење на оваа батерија се потребни повеќе од 30 минути, што е далеку побрзо во однос на конкуренцијата, на која ѝ е потребно дури четири пати повеќе време.
Внатрешноста на новиот автомобил е речиси идентична со стариот, ги има задржано сите електрични уреди. Преку огромниот 17-инчен екран во боја осетлив на допир се контролираат сите команди, а во сериската опрема се добива навигација со бесплатни ажурирања на мапите за седум години.
„Тесла моторс“ веќе прима нарачки за „модел С 70Д“, кој се нуди со три нови бои на каросеријата – океан сина, опсидијан црна и топла сребрена. Првите испораки се очекуваат за еден месец.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
