Екипата на Цедевита откако се пласираше во финалето на АБА лигата обезбеди учество во Евролигата и следната сезона. Загребчани во полуфиналната серија славеа со 3-2 против црногорскиот шампион Будуќност. Иако Црногорците ја имаа предноста на домашен терен, и по првите две средби водеа со 2-0, сепак изгореа во желбата да учествуваат во Евролигата следната сезона. Со пласманот во финалето тоа ќе ги обезбедеа, но во решавачкиот натпревар пред своите гледачи во салата „Морача“ загубија со 66-70.
Најдобри кај Цедевита беа Миро Билан со 16 поени и пет скока, Лука Бабиќ дополни со 12 поени и четири скока, а Марко Томас имаше 11 поени и шест скока. Кај Будуќност најдобар беше Џеј-ар Рејнолдс со 13 поени, три скока и пет асистенции, Планиниќ уфрли 13 поени, а Борис Савовиќ имаше 12 поени.
Во финалето Цедевита ќе игра против Црвена Звезда која во полуфиналната серија беше поуспешна од вечниот ривал Партизан со 3-1. Финалната серија започнува в сабота од 20:30 часот во „Пионир“ во Белград.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
