Анонимните се закануваат со „електронски холокауст“

Хакерската група „Анонимус“ се закани дека идната недела на 7 април во Израел ќе изврши „електронски холокауст“ за да ја избрише еврејската држава од кибернетскиот простор.

Во видео со нападите во Газа, извршени од израелската армија под името Операција заштитен раб, хакерите се закануваат дека ќе ја избришат Израел од кибернетскиот простор и дека 7 април 2015 година ќе биде електронски холокауст.

Хакерската група се заканува со напади врз сервери и веб-страници, кои припаѓаат на владата, армијата и на банките, наведува британски „Индепендент“.

– Се враќаме за повторно да ве казниме за вашите злосторства на палестинските територии, гласи пораката на англиски јазик, со превод на арапски.

Во видеото израелската влада се обвинува за кршење на човековите права, илегално населување, убивање цивили и противење на меѓународното право. Поради тоа елитни сајбер единици од целиот свет ќе се обединат во солидарност со палестинскиот народ против Израел, како еден ентитет за бришење на Израел од кибер просторот, се заклучува во видео пораката.

Анономуси преземаа кибер напади на Израел и во минатото, почнувајќи од 2012 година за време на судирот во Појасот Газа. Трета година по ред нападот ќе биде на 7 април, нешто повеќе од недела пред Денот на холокаустот.

Разузнавачкиот аналитичар од групата „Лебантјан“, со седиште во Тел Авив, Бенјамин Декер изјави за „Њузвик“ дека израелските власти не ги сметаат Анонимуси за сериозна закана. – Како минуваат годините гледаме дека наспроти усовршувањето на хакерските техники, се нанесуваат се помали штети на израелските структури, благодарение на тоа што Израел стои зад поголемиот број тактики за кибер војна во офанзива и дефанзива, истакна тој.

Анонимуси, сепак, тврдат дека во 2013 година предизвикале штета на Израел од три милијарди долари и дека нападнати биле над 100.000 веб страници, 40.000 Фејсбук профили, 5.000 Твитер профили и 30.000 израелски банкарски сметки, пренесува израелскиот весник „Аарец“.

Цел на нападите се веб страниците на Мосад, израелската армија, Банкта на Ерусалим и Министерството за надворешни работи.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.