Груевски: Нема да дозволиме марионетки да не втурнат во граѓанска војна

Ние во Владата, во државните институции со кои раководиме по волја на избирачите, нема да дозволиме марионетки да ја втурнат Република Македонија во граѓанска војна, ниту македонско-партиска, ниту меѓуетничка или меѓурелигијска. Наша судбина е соживот и меѓусебна соработка, уважување и почит. На провокации сме имуни, на опасни дејства како закана сме подготвени, порача премиерот и претседател на ВМРО-ДПМНЕ Никола Груевски на денешниот народен собир во Битола.

Ова, рече, не е Македонија од 1903, од 1912 и 1913. Не е ни од 2001-та или 2004-та. СДСМ не е победничката КПМ како што ни ВМРО-ДПМНЕ не е губитничката од 1930 година. Ова не е средба со минатото, туку битка за иднината

Груевски ги повика членовите на ВМРО-ДПМНЕ да внимаваат на провокации, да не дозволат некој да ги наседне зашто тоа, нагласи, и е намерата на опозициската СДСМ.

– Бидете горди и достоинствени, ние знаеме што правиме и која е нашата цел, ние и сакаме добро на оваа држава и на целиот наш народ, подвлече лидерот на ВМРО-ДПМНЕ.

Тој апелира Македонците, како мнозински народ, да не подлегнуваат на пропаганда, да не дозволат да бидат цел на манипуланти водени од своите чувства и политичка припадност, никогаш да не забораваат дека партии ќе доаѓаат и ќе си заминуваат од власт на избори и по нивна мнозинска волја.

– Победник секогаш и единствено е народот. Особено во вакви опасни и историски пресвртни ситуации. Народот е историски победник дури и кога наспроти себе има десеткратно посилни противници, само ако е единствен и како таков ја дочекува секоја опасност по неговиот опстанок, истакна Груевски.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.