Доделување на наградите „Виртуози 2015“

Од ланското доделување на наградите

За наградата „Виртуози 2015“ вечерва во Македонскиот народен театар (МНТ) ќе се натпреваруваат 22 музички и балетски уметници и ансамбли, во осум категории.

Признанието за најуспешен уметник за 2014 година, статуетката ќе ја понесе по еден кандидат во категориите: млад музички уметник, камерен ансамбл, музички публицист, музички настан, композитор, меѓународна афирмација, музичко­сценски уметник и музички изведувач.

Во категоријата „млад музички уметник“ ќе се натпреваруваат виолинистите Ева Богоевска и Александар Иванов и баритонот Иван Наумовски. За статуетката најуспешен „камерен ансамбл“ за минатата година ќе се одлучува помеѓу Дуото Сихана Бадивуку (виолина) и Маја Кастратовиќ (пијано), триото виолини Анна и Олег Кондратенко и Марија Вршкова (пијано) и женскиот хор „Св. Злата Мегленска“.

За победникот во категоријата „музички публицист“ комисијата ќе одлучи меѓу кандидатите Тања Вујисиќ­Тодоровска и Тина Иванова. За „Музички настан“ на годината во конкуренција се концертот на Македонската филхармонија со пијанистот Борис Березовски, современиот балет „14 часа“ и претставата „Фауст“.

Композиторот на годината ќе биде избран помеѓу Дарија Андовска, Александар Пејовски и Валентина Велковска­ Трајановска.

Во категоријата „Меѓународна афирмација“ ќе се натпреваруваат сопранот Ана Дурловски и диригентот Сашо Татарчевски.

Најуспешниот „Музичко­сценски уметник“ за 2014 година ќе биде избран помеѓу тенорот Ѓорѓи Цуцковски, примабалерината Александра Мијалкова и кореографот и танчер Игор Киров. Во трката за „Музички изведувач“ на годината се виолинистот Владимир Костов, диригентот Саша Николовски ­Ѓумар и пијанистот Тодор Светиев.

Номинациите оваа година се добиени врз основа на предлозите и мислењето на дванаесет члената стручна жири комисија, составена од стручни лица од сите значајни музички организации во Македонија. Годинава, манифестацијата ќе биде збогатена со неколку настапи во живо, на џез­ групите „Летечки пекинезери“ и Тони Китановски со „Черкези оркестар“, потоа дуото Гонце Богоромова ­ сопран и Андреј Наунов ­ пијано, дуото Ермаљ Мехмети ­ виолина и Јета Старова ­ Мехмети­ флејта, како и атрактивниот хор „Хип­хор“.

Меѓу минатогодишните носители на статуетката се: Македонската опера и балет, Дуото Кировски, хармоникашот Александар Коловски, Македонската филхармонија, композиторот Љубомир Бранѓолица, сопранот Весна Ѓиновска­Илкова, публицистот Бранка Костиќ­ Марковиќ, обоистката Гордана Јосифова­Неделковска и диригентот Борјан Цанев.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.