Штипјанки се жалат: Музиката за 8 Март ни ја наплатија 800 денари, без фискална сметка (фото)

Група гости имале горчливо искуство во една штипска кафеана. По добрата забава вчера, на денот на жената добиле фискална сметка за тоа што го јаделе и пиеле. Но, сумата не била проблем, туку тоа што го пишувало на дното на фискалната и тоа допишано со рака – 800 денари дополнително за да се плати музиката. Сумата од 4.145 денари потршени за храна и за услуга, дополнително била оптоварена со 800 денари за музика, односно рапсоложеното друштво морало да плати вкупно 4.945 денари, пишува ТВ „Стар“ од Штип.

-Ние, група револтирани граѓани, Ви се обраќаме во врска со неправилности што се случија на синоќешната прослава на 8 Март во ресторанот… (името познато на редакцијата) во Штип. Точно е дека имаше жива свирка, но кога во вторникот резервиравме маса за осум лица, никој не ни најави дека за музиката треба да плаќаме дополнително, туку само дека ќе има музика и ќе биде многу убаво. По вечерањето, побаравме сметка и ја чекавме повеќе од половина час за на крај кога ја добивме да не знаеме дали да плачеме или да се смееме… На сметката со пенкало беше допишано „МУЗИКА 800 ден.“, со инсистирање од келнерот дека музиката мора да се плати. Пред да ни ја донесат сметката, една госпоѓа цел час се расправаше нешто со газдата на шанкот, ама не знаевме зошто и како. Впрочем, се покажа дека таа се расправала за истово. А ние за да избегнеме инциденти, си ја плативме сметката со плус музика 800 денари и покрај тоа што музиката само од нашето друштво имаше „лепенки“ во текот на вечерта од 1.500 денари, плус 10 евра. Оваа неправилност сакаме да ја пријавиме до вас за понатаму да преземете соодветни мерки затоа што по добивањето на сметката, од страна на келнерот добивме образложение дека за дочек на Нова година со купување карта за влез се плаќала музиката, а сега оти не се плаќал влез морале да ни допишат 800 денари со пенкало, па ние да си платиме. И реков, си плативме… Но ниту кога резервиравме, ниту кога влеговме во локалот, никој не ни рече дека музиката ќе се плаќа екстра и тоа на ваков нелегален начин. Во прилог ви доставуваме копија во боја од фискалната сметка! Срамота за газдата ! …што решил да печали на грбот на своите редовни муштерии кои сè уште се со став дека таму има многу вкусна храна и добра кујна! Но кога ќе те удрат дебело и длабоко по џеб и стомакот почнува да мисли поинаку! А вам однапред ви благодариме! 
Со почит, група револтирани граѓани, напишале за ТВ „Стар“.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.