Потпретседателката на Европскиот парламент Улрике Луначек изјави денеска дека го поддржува проширувањето на ЕУ, наспроти заморот што постои и кај населението и кај владите на многу земји-членки на Унијата, пренесе Танјуг.
Луначек за српскиот весник „Курир“ вели дека стремежот на целокупниот Западен Балкан кон демократска, политичка, социјална и економска стабилност, е главната цел на процесот на проширување.
– Без интеграција на сите држави од Западен Балкан, мировниот проект на ЕУ нема да биде целосен – додаде Луначек.
Таа, во интервју за српски „Курир“ истакна оти ја поттикнува посветеноста на српската Влада во процесот на европските интеграции, како и на Србија да продолжи систематски со социо-економските и правосудни реформи, вклучувајќи ја и борбата против корупцијата.
Луначек оцени дека нормализираните односи со Косово и на крајот и признавањето на Косово ќе бидат услов за влез на Србија во ЕУ, истакнувајќи дека за такво нешто не постои никаков документ, но оти тоа е „политички консензус“.
– ЕУ веќе никогаш нема да прифати нова членка која нема јасно одредени и меѓународно признаени граници, како што стори со Кипар – рече таа“.
На прашањето дали очекува разјаснување на случајот со трговијата со човечки органи на Косово, Луначек одговори потврдно, напоменувајќи оти обвиненијата се тешки и оти јавноста бара да знае што е вистина.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
