ВМРО-ДПМНЕ: Македонија е заложник на СДСМ

Опозицијата да се врати во Собранието и политичката дебата да ја насочат во институционална рамка, писмено реагира ВМРО-ДПМНЕ на изјавата на Јани Макрадули од СДСМ.

„Тоа е она кое што граѓаните го очекуваат од нив, да работат за нивните интереси и интересите на државата и да се однесуваат рационално, сериозно и демократски“, се вели во реакцијата на ВМРО-ДПМНЕ.

Сите потези од СДСМ ги прават само за да ја заштитат кариерата на Бранко Црвенковски и да ги скријат неговите неуспеси и погрешни политики. Доколку Јани Макрадули одбрал да биде заложник на кариерата и политиките на Бранко Црвенковски, тогаш тоа е негово лично право и избор. Но Јани Макрадули, како и целото раководство на СДСМ не смеат и понатаму да ја држат во залог судбината и иднината на целиот народ и на Република Македонија, креирајќи фиктивна реалност, истакнуваат од ВМРО-ДПМНЕ.

Од Макрадули, како што се наведува во реакцијата, очекувале да се извини за оштетувањето на компјутерската и комуникациската опрема  во Собранието и за обидите и заканите за физичкиот напад врз повозрасна пратеничка.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.