Поетскиот карван на ДПМ продолжува во Крива Паланка

Поетскиот карван на Друштвото на писателите на Македонија продолжува во Крива Паланка. Во соработка со Центарот за култура на Крива Паланка, поетскиот карван на ДПМ, со учество на 20 истакнати поети, во овој град ќе гостува на 26 февруари во 19 часот.

На отворањето на манифестацијата ќе зборуваат Александар Рангелов, директор на Центарот за култура на Крива Паланка, и Веле Смилевски, претседател на ДПМ. Договорено е оваа средба да биде традиционална и секоја година да се одржува во втората половина на февруари.

Новиот циклус поетски карван Друштвото на писателите на Македонија го започна минатиот месец во Свети Николе. Во текот на оваа година, во рамките на проектот за дисперзија на културните настани во Македонија, ДПМ ќе реализира 17 поетски каравани. Покрај договорената соработка за оваа манифестација со библиотеките во Гевгелија, Куманово и во Велес, со Домот на културата „Иван Мазов“ во Кавадарци, со литературните манифестации „Караманови средби“ во Радовиш и „Ганеви денови“ во Кожле, поетите ќе го продолжат карванот и во Струмица, Тетово, Битола, Штип, Лазарополе, Македонски Брод, Кичево, Демир Хисар, Крушево и во Охрид. Поетскиот карван ќе заврши со традиционалната манифестација „Средба на генерации“ во рамките на Деновите на Блаже Конески кои секоја година се одржуваат од 17 до 19 декември, денот на раѓањето на големиот македонски поет, основоположник и прв претседател на македонската писателска асоцијација. Во поетскиот карван на ДПМ низ Македонија ќе учествуваат 80 поети од различни генерации.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.