Легендарниот хрватски ракометар Златко Жагмештер во интервју за „Спортске Новости“ изјави дека најдобро решение за селектор на популарните „каубои“ е Лино Червар.
„И птред 12 години го предложив Лино и сега тој е мојот фаворит. Со него освоивме две злата и четири сребрени медали. Тврдам дека со Червар како селектор, Хрватска ќе биде кандидат број еден во трката за олимписки првак во Рио Де Жанеиро“, изјави Жагмештер.
Червар и покрај длабоката финансиска криза остана во Металург и го предводи клубот кој остана без речиси комплетниот тим. По разрешувањето на Славко Голужа од кормилото на хрватската репрезентација, останува испразнето селекторското место, а Червар е еден од кандидатите.
„Брзо минува времето, а репрезентацијата не напредува. Од Европското првенство во Данска мина една година, останавме постари за овој период, но не и подобри. Червар може да донесе позитивни промени и затоа тој е мојот предлог за нов селектор на Хрватска“, додаде легендата на хрватскиот ракомет.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
