Хрватската издавачка куќа ФИДИПИ објави поетски избор од Весна Ацевска, со наслов „Мартинки“, кој се продава во книжарниците во Загреб. Изданието содржи стотина песни од сите стихозбирки на Ацевска, а автори на изборот и на препевот на хрватски јазик се професорот Борислав Павловски и поетесата Ружица Циндори.
– Мартинки се посебен вид украси, кои се даруваат за здравје, среќа и љубов. Песните во овој избор се мои пролетни мартинки за читателите, тие ги содржат студот и свежината на раната пролет, но и надежта во растежот на светлината и топлината. Оваа спротивност е виножитен мост по кој истовремено патуваат животот и смртта – изјави Ацевска.
Весна Ацевска (1952) е авторка на шест поетски книги и на три романи за млади, како и на голем број препеви од руски и од јужнословенски јазици. Нејзини поетски избори се објавени на македонски, албански и на англиски јазик во Македонија, како и во Романија, Турција, Србија, Бугарија, Полска, а сега и во Хрватска.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
