Јанакиески: Мобилизирање на кризните штабови пред новите дождови

Водостојот на реките се намалува, но мора да се направат подготовки поради најавите за нови врнежи од дожд и снег за утре попладне, изјави денеска министерот за транспорт и врски Миле Јанакиески, кој беше во посета на поплавеното подрачје на Црна Река кај Тополчани и кај Кадино Село, каде Градската река го проби коритото и е излеана во Прилепско поле. Јанакиески претходно беше и во општина Новаци.

Според метеоролозите, меѓу подрачјата кои ќе бидат под влијание на новиот бран на дожд и снег е и пелагонискиот.

На местото каде што е излеана Градската река денеска вработените во прилепските јавни претпријатија правеа насип да ја вратат водата во коритото.

Јанакиески посочува дека во овој период сите општини ги санираат штетите од поплавите. Се прават насипи, водостојот во акумулациите се намалува, а кризниот штаб будно ја следи ситуацијата.

– Алармираме сите општини, како што тоа го прават Новаци, Битола, Прилеп да ги активираат своите кризни штабови и да активираат повеќе луѓе кои ќе работат на насипи, пред се, за заштита на куќите, на добитокот – рече министерот.

Апелираше до сите жители на Македонија да ја покажат својата хуманост и со вртење на телефонските броеви што ги објави Црвениот крст да донираат по 100 денари или директно да уплаќаат на жиро сметка.

Според Министерот за транспорт и врски последната бројка покажува дека се поплавени стотина куќи.

– По последниот, вчерашен податок, 100 куќи во земјава се целосно поплавени, но има уште повеќе поплавени дворови, а непрегледни се површините земјоделско земјиште под вода – вели Јанакиески.

Според градоначалникот на Прилеп, Марјан Ристески денеска главно се прават и одржуваат насипите. Последните два дена се правеа насипи на Црна Река, а денеска на Градска река кај Кадино село каде е пресечено коритото.

– И денес екипите на „Комуналец“ и на војската работат на насипите, нивно одржување и правење нови, како што е случајот на Градска река. До вечер ќе бидат затворени пресеците на коритото – вели Ристески.

Општинската комисија ќе излезе на терен за процена на штетите од поплавите, а санацијата на инфраструктурата ќе биде откако водата ќе се повлече.

Во Центарот за јавно здравје готови се резултатите од земените мостри вода за пиење од бунарите и локалните водоводи во Прилепско, Кривогаштанско, Долненско и Крушевско.

Како што објаснува директорот на центарот Гоце Ингилизов освен во двата случаи на загадени јавни чешми во селото Крушеани, засега нема неисправна вода, но е заматена. Водата од регионалниот систем „Студенчица“ е исправна.

– Резултатите покажаа, освен во двата случаи со јавните чешми, кои не се во системот за пиење во Крушеани, во населените места во регионот нема бактериолошки неисправна вода. Во најголем случај е заматена и секако, без исклучок водата мора 10 минути да се преврива. Се прават контроли во градинките и училиштата за да се забележи ако има отсуства на децата -изјави Ингилизова.

Освен неколку пријави, засега епидемиолошката здравствена состојба е мирна.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.