Наставници во Гевгелија против одлуката на СОНК за штрајк

Гевгелиски наставници нема да се приклучат на најавениот штрајк на СОНК и во вторник ќе продолжат со предавањата во второто полугодие на учебната 2014/2015 година.

– Наставниците од нашето училиште членови на СОНК на денешниот состанок по пат на тајно гласање се изјаснија дека не го поддржуваат штрајкот на СОНК и дека во вторник сите редовно ќе бидат на своите работни места и ќе го продолжат наставниот процес во второто полугодие, изјави Магдалена Каркалашева, директор на ОУ „Крсте Мисирков“ од Гевгелија.

Градоначалникот Иван Франгов изјави дека во сите училишта наставата непречено ќе продолжи, а доколку се случи некои наставници да се вклучат во штрајкот, ќе бидат заменети за да нема прекин во наставниот процес.

Според директорите на училиштата, се е подготвено за успешен старт на второто полугодие. Обезбедени се доволни количини нафта за греење и подмирени се финансиските обврски на локалната самоуправа за превоз на учениците.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.