„Шпигел“: Сирија тајно гради нуклеарен комплекс

Сириските власти тајно градат подземен комплекс каде би можеле да произведуваат атомско оружје, тврди во денешното издание германскиот неделник „Шпигел“.

Повикувајќи се на „ексклузивни документи, сателитски снимки и прислушувани разговори од страна на тајните служби“, весникот наведува дека комплексот се наоѓа во тешко достапен планински реон во западниот дел на Сирија, на два километри од либанската граница.

Сместен во близина на градот Кусеир, објектот, чие тајно име е „Замзам“, има пристап до вода и струја и може да служи како место за изградба на реактори или за производство на збогатен ураниум, тврди „Шпигел“.

Западни експерти за весникот изјавиле дека сириските власти во комплексот пренеле осум илјади шипки, кои порано се наоѓале во тајниот објект Ал Кибар, за каде постоеја сомнежи дека има нуклеарен реактор.

Ал Кибар беше уништен во 2007 година при воздушен напад за кој постои смонеж дека го извршила израелската армија. Израел меѓутоа никогаш не ги потврди ваквите информации.

Според „Шпигел“, во „Замзам“ работат севернокорејски и ирански нуклеарни експерти, а комплексот го обезбедуваат припадници на просириското либанско шиитско движење Хезболах.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.