Во очекување на нови предлози и за евентуално подобрување на предлог-законот за високо образование седницата на собраниската Комисија за образование, наука и спорт се одложи за еден ден. До утре се очекуваат новите предлози. Комисијата ќе се состане утре во 10 часот во салата „Борис Трајковски“ во Собранието на РМ. Претседателката на Комисијата Олга Најденовска изјави дека единствена причина за одложувањето е да се остави време за сугестии во однос на пакетот образовни реформи.
На дневниот ред ќе бидат седум предлог-закони во второ читање: за изменување и дополнување на Законот за основното образование, за изменување и дополнување на Законот за средното образование, за изменување и дополнување на Законот за високото образование, Предлог-закон за Академијата за наставници, Предлог-закон за наставници во основните и средните училишта, Предлог-закон за обука и испит за директор на основно училиште, средно училиште, ученички дом и отворен граѓански универзитет за доживотно учење и Предлог-закон за високообразовните установи за образование на наставен кадар во предучилишното воспитание, основното и средното образование (за педагошки факултети).
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
