Македонската филхамонија првиот концерт го посветува на Божик

Македонската филхармонија ќе го одржи првиот концерт оваа година на денот на големиот христијански празник Божик.

На концертот насловен како Божикен ќе бидат изведени композиции од Јохан Себастијан Бах како што се „Синфониа“ од „Божикниот ораториум“ и неговата позната Оркестарска свита бр.3, како и „Божикниот концерт“ на Корели. Публиката ќе има можност да слушне и арии од Хендл, а за првпат ќе биде изведена и „Лаудате доминум“ од Моцарт.

Како солист ќе настапи македонската оперска певица сопранот Сандра Митровска, а диригент ќе биде Борјан Цанев. Специјални гости се децата од хорот „Пиколо“ од ДМБУЦ „Илија Николовски – Луј“ кои под раководство на Весна Димчевска заедно со Македонската филхармонија ќе ја изведат познатата „Аве Марија“ на Качини.

Концертната сезона на Македонската филхармонија продолжува на 22 јануари кога ќе настапи јапонската виолинистка Акико Суванаи.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.