Српската православна црква го коригира соопштението за неодамнешната посета на рускиот митрополит Иларион на Скопје во кое Република Македонија беше именувана како „ПЈРМ“, јави МИА.
Во новото дополнето соопштение потпишано од портпаролот на СПЦ епископот бачки Иринеј, „ПЈРМ“ е заменето со Р.Македонија, но за Македонската православна црква – Охридска архиепископија и натаму се користат термините „самопрогласена и неканонска“.
СПЦ во соопштението објавено на нејзината интернет-страница ја поздравува иницијативата на Руската православна црква искажана при неодамнешната посета на митрополитот Иларион на Македонија за надминување на несогласувањата меѓу Македонската и Српската црква, како и за ослободување на Јован Вранишковски.
Г. Иларион во Скопје се сретна со поглаварот на МПЦ – ОА г.г. Стефан, со претседателот Ѓорге Иванов и со премиерот Никола Груевски.
Светиот архиерејски синод на Македонската православна црква – Охридска архиепископија по посетата на митропилитот Иларион, соопшти дека ја прифаќа иницијативата на Руската православна црква да даде придонес за обновување и успешно реализирање на дијалогот меѓу МПЦ – ОА и Српската православна црква и побара од македонските власти милост за поранешен митрополит Јован Вранишковски заради, како што беше наведено, повисоки цели.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
